【美食】廣島宮島牡蠣屋蠔專門店：不能錯過的蠔宴－「立」即去旅行 Lap's Travel

在廣島想起食的話，一係就會諗起廣島燒，一係就會諗起廣島蠔。今次來到四面環海的宮島，理所當然要食下廣島蠔啦！但今次在這間名叫牡蠣屋的蠔專門店食到的不是廣島蠔，而是宮島蠔！由於宮島的蠔養殖場海面自然災害較少，配合適當的潮水流動為蠔提供左極佳的飼養環境，培育出味道和一般廣島蠔不同的宮島蠔。這種蠔蠔味濃厚，鐵質味和海水味相對地較少一點，口感軟滑可口。

餐廳在宮島非常出名，除了所用的蠔在宮島出產，連餐廳所生產的商品，例如蠔佃煮、蠔漬物抑或是蠔醬油，都係一手一腳100%在宮島上生產，絕對係最正宗的味道！而牡蠣屋更威風到登上了米芝蓮於廣島牡蠣料理類別，唯一推介的餐廳，於tabelog有著3.61的高分數！

一入餐廳門口處，已經聞到陣陣燒蠔的香烤味，因為成個燒蠔既爐頭就在門口處，而旁邊則是一堆生蠔既山，睇見都覺得吸引！而餐廳內裡有兩層，裝修係日式西式混合，入邊有個大酒窖，喜歡嘆的可以來個美酒配生蠔享受下。

來到牡蠣屋必定既，一定係佢個限量發售的特選牡蠣屋定食！佢定食有兩款，一款係2150Yen平點的，而特選那款就係2690Yen，兩者最大既分別就係炸蠔，普通那款炸蠔係細細隻，而特選的足足有成隻手掌咁大！定食一次過有齊咁多款，包會食蠔食得很過癮。

先講碗飯，用上三隻飽滿蠔仔既飯，米飯吸收了蠔嘅精華，食完一細碗覺得完全唔夠喉；至於炸蠔火候控制得很好，外脆內Juicy，蠔味濃厚又唔腥，炸完依然保持到內裡蠔既鮮味，一流！另外嗰啲蠔既漬物，醃製過但都搶唔去蠔既鮮甜味；至於燒蠔唔會燒得太乾身剛剛好，外層香脆，咬開仲食得出蠔既新鮮；仲有碗蠔味噌湯，以為味噌湯本身已經鹹，如果加左蠔仔既海水味會更鹹，咁就大錯特錯啦，飲落去去濃味而鮮甜，係日本其他地絕對少有用蠔製作成的味噌湯。