「立」即去旅行 Lap's Travel

第1天（星期六，14/1）

行程：香港 》維也納機場 》布拉格機場 》兌錢 》酒店 》晚餐

朝早10:40就正式上奧地利航空飛機出發去維也納轉機，係飛機上既12個鐘係差不多完全瞓唔到，因為早上機，所以前一晚睡夠了，結果係不停煲劇同睇下螢幕飛到去邊。上機冇幾耐已經先派左一包小食，然後就食飛機餐，有牛肉配炒麵或雞肉配飯。雞肉配飯好食過個炒麵好多，另外再派左個小麵包，煙煙韌韌幾好食，又有麵包香，所以我食左2個。基本上成程機都不停派飲品、派呢個麵包，所以絕對唔會餓親。而再之後派既早餐係芝士長通粉，味道非常不錯，可惜份量比較少。整段機程都飛得幾穩定同舒服，座位唔算話太窄，服務員態度都幾親切。

差不多到降落維也納機場嗰陣，座位前個螢幕就會顯示落機後要去既閘口，呢個機場出名轉機時間快，初初都擔心會趕唔切，結果其實時間好鬆動，再加上飛去布拉格班機延誤，所以有時間慢慢等轉機。一見到飛往布拉格班機，其實有少少O嘴，因為班飛機好落後，係會見到左右兩個螺旋槳外露轉轉轉嗰種飛機，而且得十幾人，所以係一架超細一排四座位既飛機。成段機程都超級嘈，好彩飛得唔高之餘亦只係飛左20分鐘就降落，所以即使係延誤左黎，都仲可以準時黎到布拉格。

到達布拉格機場，除非是一早已經預訂了車有司機接手，否則就要自己搭車出市中心。至於點樣搭公共巴士出市中心，可以參考返【交通】布拉格機場到市區介紹（按標題）。18:15係原定到達布拉格機場的時間，我18:42已經拎完行李去搭車了，所以即刻拿拿臨飛奔去市中心，拉住個行李去兌克朗（捷克貨幣）先，兌換店係近廣場附近的Exchange s.r.o.（按名介紹）。不過布拉格條街係滿佈凹凹凸凸既石路黎，非常之唔方便拉行李，所以要留意一下。

搭完成日機又拖住個行李，所以即刻返住宿處安頓左先，今次係住Oasis Prague Apartments（按名介紹），附近環境安靜又近布拉格景點，價錢又實惠，又似住入當地人的家，我覺得感覺還可以的。然後即刻出去醫肚，去左Restaurace Blatnice（按名食評）食係布拉格既第一餐捷克菜，雖然個人精神好疲累，但見到一堆美食，精神當堂為之一振。不過，食完之後實在太攰，加上都夜了，四圍店舖都閂哂，所以就返去Apartment瞓了。

「立」即去旅遊Youtube channel、Facebook專頁、Instagram、Pixnet：

Youtube Channel：https://bit.ly/2scNVfk 

FB： https://www.facebook.com/lapstravel/

IG：lapstravel