「立」即去旅行 Lap's Travel

去歐洲好多人都會買名牌，但東歐並沒有西歐那些國家那麼富裕，所以可以有好多特產可以選購。雖然來到這些冷門點的國家，不像日本手信咁五花八門又賣相精緻，但戰鬥力高強的我依然可以買到滿載而歸，重點係各類手信價位唔係好高，買幾多都唔會心痛，所以一於出力買買買呀！首先從布拉格買既手信講起，下圖左上角一盒黃一盒啡既，兩者均購自當地超級市場，啡色係朱古力味溫泉餅，口感脆脆但又好薄好大塊，有點像某種香港都買到的日式餅乾，但這款就甜好多，買來做手信分畀人食都幾好既；黃色個盒就係傳統捷克甜品，蜂蜜千層蛋糕，味道係檸檬味，口感唔似在布拉格食既咁乾，同時亦幾軟身，比想像既好食有驚喜，食過既人都係同一個feedback話有點似嘉頓某款蛋糕卷既味，而且個蛋糕好大個加上好甜，可以買來做手信分畀好多人。然後是右下中間少少既係水晶指甲剉，因為捷克最出名係水晶，購自哈維爾市場，而且價錢很相宜，買畀親朋戚友既好選擇，在匈牙利布達佩斯的中央市場都有得買，不過花紋就唔同。再來就是右下角在布達佩斯買的，是最出名的琥珀飾物，耳環是國會大廈門口處手信部買，而手鏈是中央市場買；隔離位的是水晶座、像浴缸那個是裝番梘、一包一條條既辣椒和充滿匈牙利特色的扣章，全部也是來自中央市場的。中間下面三盒黑色既係朱古力，都係購自中央市場，見到上面貼住拎獎就買左幾盒試下，結果得一盒上面有紅莓的白朱古力係好食、綠色係上面嗰盒係糖漬薄荷葉朱古力，味道好奇怪、有盒有啲nuts係上面既超級苦，而且堆nuts好難食，唔建議買。另外仲有左上角兩盒野前既有個圓型皮革散銀包和藍色彩蛋裝飾。至於瑞士既手信，唔使問就一定係朱古力，不過就唔係瑞士蓮同三角朱古力，而係中間一盒同一包散左叫既，價錢唔平但係超級好食，兩者都係琉森買，盒裝一粒粒既每一粒都唔同味既松露朱古力，有些有酒味又入口即溶，朱古力味很有層次；而散裝叫既係開心果朱古力和玫瑰花紅莓白朱古力，開心果很多，每一口都食到開心果口感好豐富，又同朱古力好夾；玫瑰花那個白朱古力甜得來又有紅莓的酸中和返，而且每次食完係有after taste，玫瑰花味會滲返出來好特別嫁。間店係可以試食的，試左先買又可以揀要幾大塊，真係要買來試下。

再來要介紹既係布拉格買既，首先係來自品牌Manufaktura既啤酒花味洗頭水，標榜天然聞落去超香，但就唔係幾適合我髮質，洗完之後髮質變到好粗咁唔夠順滑；再來就係一系列在Botanicus買既護膚品，有海底泥洗面梘、金盞花面霜以及黑眼圈精華，面霜塗完有點黏，不過很保濕又令皮膚變亮白了、黑眼圈精華也慢慢地淡白了黑眼圈、奈何兩種洗面梘對我的膚質來說完全不適合，用完後狂甩皮情況好嚴重，結果停用了就慢慢改善返，但我朋友就冇這個問題，所以真係因人而異。

至於布達佩斯的，以下全部係購自中央市場，一定要買既係一款叫Tokaji 甜腐酒，佢有好多種牌子，我就只買了這款，在市場多數也見到的牌子，佢上面有個數字，由3到6，數字越大就味道越甜，價錢亦越貴，基本上4度喝下去已經像飲蜜糖酒，連我不是太愛好杯中物的也覺得非常容易入口頗好喝的；另一樣買既係蜂蜜，裡面仲要有蜂巢嫁！平時如果香港買都要差不多2xx啦，依家只需要幾十蚊，飲落仲好清甜。然後是黑松露和魚子醬，老闆娘介紹黑松露可以用些油，用哂的話就再入返橄欖油落去浸下，得閒可以切些黑松露出來煮下野，但開左記得放入雪櫃，否則很容易發霉，味道我就覺得不是很濃；魚子醬味道也不錯，配麵包或是餅乾一流；然後是一系列辣椒醬和辣椒粉，紅色蓋是辣、白色蓋是不辣、黑色蓋是4倍辣，白色的不只辣而且幾鹹，泥黃色辣椒粉是煙燻味，佢所有辣椒副產品都有分辣和稱為甜，但全部吃下去所謂甜的都是鹹而已，但價錢相宜又係特產，輕易地就買了一堆來作手信。另外仲有鵝肝，不是人人也喜歡的，不過實在是匈牙利特產，有些更加了黑松露落去，但我就冇買到，只買了基本口味，味道唔錯的，塗麵包再烘下一流，而銅鑼灣sogo超市依家都有得買，但價錢就貴了幾倍，所以在布達佩斯記得買多啲。

在瑞士機場唯一有買的是這盒糖漬香橙朱古力，塊橙都幾甜但朱古力唔好睇佢好似好薄咁，佢朱古力味好濃帶微苦，有效地中平左片橙既甜，不錯的。另外在琉森買左盒類似馬卡龍的，佢地唔係叫馬卡龍但我唔記得叫咩，anyway，食落都係似馬卡龍，不過係細粒減甜版，好多味食落去都好糖精，但細細粒試下都唔錯既。

連冇咩野買既東歐都可以買到野返來，真係佩服自己既戰鬥力！