【美食】布達佩斯 Menza 匈牙利菜：三次光顧的餐廳－「立」即去旅行 Lap's Travel

不得不介紹的這間叫Menza的餐廳，是全個東歐旅行之中所幫襯過的餐廳野食最好的一間，而且價錢仲好實惠，地點又方便，搭到去黃色線的Oktogon站再行幾分鐘就會到。所以四晚在布達佩斯之中，足足來了三晚！而呢三晚間餐廳都非常爆場，好彩我每一次都好早來，否則一定冇位！餐廳既裝修充滿強烈八、九十年代的風格，幾有格調的，如果著住現在Gucci復古風格的衣服來，應該會和環境好夾。

第一晚：

飲品還是先行的，一杯橙味既soda汽水（540福林），基本上每一次飲這類soda汽水也不會出事的，而且好開胃。第一款是Weekly Offer，並不是平常在menu內的菜式，係一款維也納式炸雞（3990福林），中間釀左芝士，一切開芝士直頭流心出來超級正，而且雞肉食落好嫩一點也不嚡、而下面的係芝士蘑菇risotto，飯入面有點像梅的東西又酸又甜咁，如果冇左會好好多；而另一樣係正常餐牌有的，係煎三文魚配菠菜和荷蘭汁（3990福林），荷蘭汁超香超好味，配上三文魚煎得好嫩滑，估唔到同菠菜同個汁又好夾喎，食到停不到口；再之後因為前兩者太好食，所以再叫多左個橄欖油炒蝦意粉（2990福林），炒得都幾彈牙但就冇前兩個咁令人印象深刻。

然後到甜品環節，又係weekly offer來的，1090福林的焦糖布甸，表面睇平平無奇，但原來內裡竟然係紅菜頭來的！！紅菜頭竟然可以咁樣做甜品，係香港一定搵唔到呀！歐洲人真係識得玩紅菜頭玩到出神入化，意想唔到仲要幾好食（我有點怕紅菜頭有種草腥味），真係要寫個服字！

第二晚：

呢晚叫得比較少野，因為本身黎之前飽飽地，野飲都係第一晚個杯，主食係煎牛柳配薯仔（4990福林）同煎雞胸配紅菜頭risotto（2690福林）。先講牛柳，煎得不錯唔會太韌，而薯仔份量好多，都幾惹味；至於個雞，食落似足香港食的油雞，而且始終係雞胸所以免不了嚡左少少，個飯就充滿紅菜頭味幾好食的。

第三晚：

係離開布達佩斯之前的最後一餐，飲品方面叫左Lemonade soda加水果（1190福林），其實同第一晚個杯大同小異；主食方面亦係encore返第一晚個兩個主食。反而係今次試多左個湯同甜品，湯係Weekly offer的粟米湯配炸青椒（1190福林），飲落去像飲粟米蓉甜甜地，但食得辣先好整爛舊青椒，因為真係超級辣到噴火；而甜品係招牌朱古力蛋糕配開心果雪糕和紅莓醬汁（1090福林），類似我的朱古力心太軟，好濃厚朱古力味，而開心果雪糕係自家製的，非常軟滑勁好食，可惜細左點；而紅莓醬汁的酸，剛剛好中和了又平衡了前兩者的甜，配合得天衣無縫。