【美食】布拉格 Restaurace Sedm konšelů 捷克菜：水準驚喜的傳統菜－「立」即去旅行 Lap's Travel

今趟旅行在布拉格的最後一餐就是Restaurace Sedm konšelů，如果搭地鐵就係Staromestska站（綠色A線）落最近，其實佢就係係舊城廣場附近，直頭係之前介紹嗰間布拉格兌換店Exchange s.r.o.爭一個街口，唔算太難搵。本身其實對呢餐冇咩期待，因為成個布拉格之旅的野食其實唔算好啱口味，好多之前睇上網介紹既一試，發覺其實都係不外如是，但好彩最後一餐黎左呢到，黎個反高潮，雖然佢係提供傳統捷克菜，但味道令人非常驚喜，原來捷克菜也幾好食的。

一入餐廳是先下樓梯，就像落地庫一樣，裡面的環境就像是一間典型小餐館，因為好早黎到所以就冇乜人。基本上差不多每間到過的布拉格餐廳都有一個酒吧位，果然是愛好酒精的地方。但我依然是決定飲果汁作為開頭，今次決定飲梨汁（34克朗），味道唔錯。

因為唔係太肚餓，所以直接叫了兩個主餐來食，牛裡脊肉片配忌廉汁、小紅莓同一款類似麵包饅頭捷克人稱為dumplings（麵團），係當地人主要食糧，像我們食飯同麵一樣（138克朗）。醬汁味道有點像Ikea食肉丸時嗰種汁，只係配左做牛肉，牛肉口感好軟稔又唔會騷；至於堆一塊塊既麵團原來幾好食，有點煙煙韌韌和甜甜點，而且非常汲汁，意想不到這道傳統捷克菜式係咁好味。而另一樣係巴馬芝士忌廉蘑菇意大利飯（134克朗），係超香濃芝士味，而且係可以拉出絲，每一口飯也被芝士黏住，飯唔會煮得太熟而爛又唔會太生而變得硬，份量仲要唔少。